መምሪያው በከተማ ውስጥ ምርታማ የሥራ ዕድሎችን በመፍጠርና የሰው ኃይልን ብቃት በማሳደግ ረገድ ማዕከላዊ ሚና ይጫወታል። በዚህም መሠረት፡- (ሀ) የከተማን የሥራ ገበያ ፍላጎት በማጥናት በቴክኒክና ሙያ ኮሌጆች የሚሰጠው ሥልጠና ከገበያ ፍላጎት ጋር እንዲጣጣም ያደርጋል፤ (ለ) የሥራ አጦችን በመመዝገብና ክህሎታቸውን በማወቅ ከአሠሪዎች ፍላጎት ጋር በማገናኘት የሥራ ስምሪት አገልግሎት ይሰጣል፤ (ሐ) ጥቃቅንና አነስተኛ ኢንተርፕራይዞችን በማቋቋምና በማጎልበት ለወጣቶችና ለሴቶች የሥራ ዕድል ይፈጥራል፤ (መ) በከተማ ውስጥ በሚገኙ የቴክኒክና ሙያ ኮሌጆች የሚሰጠውን የሥልጠና ጥራት በመቆጣጠርና በማስተባበር ረገድ ድጋፍ ያደርጋል፤ (ሠ) የሠራተኛና አሠሪ ግንኙነትን በማስታረቅና የሠራተኛ ሕጎች መከበራቸውን በማረጋገጥ የኢንዱስትሪ ሰላም እንዲሰፍን ያደርጋል፤ (ረ) ከማኅበረሰብ ተሳትፎና ሀብት ማሰባሰቢያ ጽሕፈት ቤት ጋር በመተባበር ለችግር ተጋላጭ ወጣቶች የሥራ ዕድል ፈጠራና የክህሎት ስልጠና ፕሮግራሞችን ያቀናጃል።