መምሪያው የከተማን የበጀት አዘገጃጀት፣ አፈጻጸምና ቁጥጥር በበላይነት የሚመራ ከፍተኛ አካል ነው። በዚህም መሠረት፡- (ሀ) የከተማን ዓመታዊ በጀት በማዘጋጀት ለከተማ አስተዳደር ምክር ቤት በማቅረብ ሲፀድቅም አፈጻጸሙን ይከታተላል፤ (ለ) ከክልል ፋይናንስ ቢሮ ጋር በመተባበር የከተማ የገንዘብ ሂሳቦች በሥርዓት መያዛቸውንና የፋይናንስ ሪፖርቶች በወቅቱ መቅረባቸውን ያረጋግጣል፤ (ሐ) የከተማ መምሪያዎችና የበታች አስተዳደር አካላት የፋይናንስ አስተዳደር አቅም እንዲጎለብት የቴክኒክ ድጋፍና ክትትል ያደርጋል፤ (መ) በከተማ ውስጥ የሚንቀሳቀሱ መንግሥታዊ ያልሆኑ ድርጅቶችን ፕሮግራሞች በማስተባበርና አፈጻጸማቸውን ከከተማ ፕላን ጋር በማጣጣም ረገድ ድጋፍ ያደርጋል፤ (ሠ) የከተማ መንግሥት ንብረት (ተንቀሳቃሽና ቋሚ) አያያዝ ሥርዓት ተዘርግቶ እንዲሠራ በማድረግ ከመንግሥት ግዥና ንብረት አስተዳደር ባለሥልጣን ጋር በመተባበር ንብረት ላይ ቁጥጥር ያደርጋል፤ (ረ) በከተማ ውስጥ የሚከናወኑ የልማት ፕሮግራሞችን የገንዘብ አፈጻጸም በመከታተል ውጤታማነታቸውን ለማረጋገጥ ከፕላንና ልማት መምሪያ ጋር ይሠራል።